Талент на Работнички потпиша за Лидс Јунајтед!

Хоџа потпиша тригодишен договор со Лидс и во почетокот ќе настапува за тимот до 21 година. Напаѓачот неодамна наполни 18 години, а ја доби довербата на клубот по успешниот пробен период во Англија.

Станува збор за централен напаѓач висок околу 193 сантиметри, кој минатата сезона остави одличен впечаток во македонскиот шампионат. Хоџа постигна шест гола на 22 натпревари во сите конкуренции, а особено впечатлив беше во завршницата од сезоната, кога учествуваше во четири гола на последните пет првенствени натпревари. Младиот фудбалер доби шанса и на европската сцена, откако настапи за Работнички во квалификациите за Конференциската лига.

Хоџа е и македонски младински репрезентативец. Настапуваше за селекциите до 17 и 18 години, а во последниот период беше дел и од репрезентацијата до 19 години.  Преселбата во Англија претставува голем чекор во неговата кариера. Лидс во него гледа голем потенцијал, а првата цел на Хоџа ќе биде да се наметне во тимот до 21 година и постепено да се приближува до првиот состав.

За македонскиот фудбал ова е уште еден значаен трансфер на млад играч во силна европска средина, каде Хоџа ќе има можност да се развива во академијата на премиерлигашот од Јоркшир.