Бразилка доби петгодишна суспензија - шутираше противничка во глава! (ВИДЕО)

25 јули 2026 - 15:08

Општинското првенство во футсал за жени во бразилскиот град Еузебио го одбележа сериозен инцидент поради кој една фудбалерка е казнета со петгодишна суспензија.

За време на натпреварот меѓу екипите РДЈ Спорт и РСН кој се одигра на 22 јули, дојде до физичка пресметка по еден дуел на теренот.

Фудбалерката на РСН со број 10 најпрво ја соборила противничката на паркетот, а потоа, додека таа лежеше на земја, ја удираше со нога во главата. Во обид да ја смири ситуацијата, друга футбалерка исто така била нападната и добила удар во лицето.

Во конфликтот потоа се вклучиле и членовите на стручните штабови на двете екипи, кои успеале да ја совладаат агресивната фудбалерка по што натпреварот беше прекинат и регистриран со 1-0 во корист на РДЈ Спорт.

Градските власти на Еузебио соопштија дека футсал лигата, по разгледувањето на извештаите од службените лица, ја изрекла максималната дисциплинска мерка и ја суспендирала играчката од сите натпреварувања под нејзина организација во следните пет години.