Дваесет часа откако Вардар ги понижи, пелистерци на отчет пред своите навивачи!

08 мај 2026 - 15:34

Ракометарите на Пелистер денеска само дваесет часа по дебаклот во Скопје против Вардар ги чека нов натпревар во Суперлигата и тоа против Бутел на свој терен, а во овој дуел поради големото незадоволство кај навивачите атмосферата на трибините може да биде „жешка“.

Навивачите се бесни и бараат отчет, не го криеја незадоволството и преку социјалните мрежи каде што испраќаа жестоки критики за нивното бледо издание против најголемиот ривал, без разлика што титулата речиси беше во рацете на Вардар и пред натпреварот.

Дека владее огромно незадоволство покажува и тоа што вчера во Скопје немаше гостински навивачи.

Веднаш по вчерашниот натпревар на Фејсбук страната на Чкембари беше објавена кратка порака со жестока навреда ракометарите.

Утрово следуваше и нова реакција во која навивачите се огласија со соопштение во кое прстот покрај ракометарите го вперуваат и во стручниот штаб, но и во раководството.

Токму поради сето тоа денешниот дуел против Бутел кој почнува во 17:30 часот може да биде и можност навивачите и јасно пред ракометарите да го покажат својот револт од неуспешната сезона во која битолскиот клуб остана без трофеј.