Не е само Формула 1: Одложен митинг од Дијамантската лига

09 април 2026 - 10:49

Атлетскиот митинг од Дијамантската лига во Катар е одложен од мај за јуни, „доколку условите дозволуваат“, поради безбедносни проблеми и неизвесност предизвикана од конфликтот на Блискиот Исток.

Настанот во Доха, кој требаше да ја отвори сезоната на елитните атлетски серии од 8 мај, сега е преместен на 19 јуни, со што сезоната ќе биде отворена во Шангај на митингот што ќе се одржи на 16 мај. Организаторите изјавија дека одлуката е донесена по консултации со локалните власти и надлежните институции, додека внимателно ја следат ситуацијата во регионот.

„Во интерес на безбедноста на спортистите и гледачите, донесена е одлука за одложување на натпреварот. Доколку условите дозволуваат, натпреварот ќе се одржи на 19 јуни“, се вели во соопштението на Дијамантската лига.

Поради високите температури во Катар во текот на јуни, натпреварот ќе биде преместен на стадионот „Калифа“, кој е опремен со системи за ладење и претходно се користел за големи атлетски натпревари. Претходно, поради кризата на Блискиот исток, откажани беа трките од Формула 1 во Саудиска Арабија и Бахреин, како и Финалисима, дуел на шампионите на Европа и Јужна Америка што требаше да се игра во Доха.