Македонија ќе добие најмалку девет милиони евра ако се пласира на СП 2026

17 декември 2025 - 16:46

Светската фудбалска федерација (ФИФА) го објави наградниот фонд за Светското првенство (СП) во 2026 година и истиот ќе изнесува околу 558 милиони евра, а познато е колку ќе добие секоја од селекцијата во зависност од нејзиниот пласман, па така и Македонија гледа потенцијална заработка со евентуален настап на турнирот.

Доколку македонската фудбалска селекција се пласира на Мундијалот, тогаш ќе добие најмалку 7,6 милиони евра, а притоа ќе добие и околу 1,4 милиони евра за подготовките за настап на СП 2026.

ФИФА за селекциите кои ќе се пласираат од 33. до 48. место ќе додели по 7,6 милиони евра, на тимовите од 17. до 32. место по 9,3 милиони евра. По што наградата се зголемува на 12,7 милиони евра за репрезентациите кои ќе завршат од деветто до 16. место.

Селекциите од петтата до осмата позиција ќе си заработат по 16,16 милиони евра, додека четвртопласираниот ќе инкасира 23 милиони евра, третопласираниот ќе добие 24,67 милиони. За вицепрвакот се резервирани 28 милиони евра, додека за шампионот неверојатни 42,5 милиони.