Македонија на најтешкото гостување во претквалификациите

Ирците, барем на хартија, се поквалитетни од нашиот прв ривал, поради што денешното гостување треба да биде најтешко во овој циклус, но и тие доживеаја сензационален пораз од Луксембург на стартот од овој циклус. Пред три дена, аутсајдерот во групата славеше со 12 разлика на домашен терен со што можеби ни направи услуга, но и натаму, денешниот меч останува најтежок за Македонија во овие претквалификации.

„Убедливо го совладавме Азербејџан, но искрено, тоа не е мерило за квалитетот бидејќи сме далеку подобра селекција. Она што можам да го кажам е дека имаме добра група на момци кои работат напорно, гинат за секоја топка на теренот и покажуваат карактер, што е најава за уште подобри резултати во иднина. Јас сум убеден дека можеме да играме далеку поквалитетно, особено кога би биле комплетни со враќањето на Димитријевиќ и на Маслинко.

Ме радува тоа што атмосферата е на највисоко ниво. Имаме добри услови за работа, што е предуслов и за добри резултати. Искрено, мислам дека не ни е местото во оваа група. Односно дека имаме многу поголем квалитет од нив, а тоа сакаме да го покажеме на терен. Да бидеме први во групата и да се пласираме во главните квалификации, и да играме со репрезентации кои се на нашето ниво“, рече капитенот Војдан Стојановски во пресрет на мечот во Даблин.

Во однос на дуелот против Азербејџан, селекторот направи една измена бидејќи на местото на Омари Мур во комбинација сега е Џејкоб Вајли што треба да ни донесе цврстина под кошевите и поголема моќ. Останатите играчи се истите од првиот натпревар и со идентичен пристап како пред три дена, можеме да се надеваме на нов триумф. Дуелот против Ирска се игра во Даблин од 18 часот и со евентуална победа, Македонија ќе ја заврши годината на првото место во групата и ќе ја потврди фаворитската улога.