Пелистер размонтиран во Унгарија - најтежок пораз сезонава во ЛШ!

20 ноември 2025 - 20:18

Македонскиот ракометен првак Пелистер вечерва беше поразен со 20-35 од Пик Сегед во осмото коло од Лигата на шампиони (ЛШ), што е најтежок пораз оваа сезона за битолчани во елитното натпреварување.

Пелистер даваше отпор на стартот на мечот (3-3), по што Пик Сегед со серија од 4-0 стигна до прендост од 7-3. Македонскиот шампион се трудеше да ја намали разликата, но не му одеше најдобро и постигна само девет голови во првиот дел, односно на паузата замина со негатива од 9-14.

Битолчани имаа проблеми во нападот и во второто полувреме, додека Пик Сегед доминираше пред голот на Никола Митревски и успешно ја зголемуваше разликата сè до конечни 35-20.

Најдобри стрелци кај унгарската екипа беа Кукиќ и Фримел со по седум голови, додека Манасков, Атанасијевиќ и Хаџиќ запишаа по три погодоци за Пелистер.

Екипата од Битола по осум одиграни кола се наоѓа на седмата позиција со четири бодови, додека Пик Сегед е на четвртата позиција со осум бода.

На останатите натпревари кои се играа во истиот термин, Динамо Букурешт славеше против Нант со 29-28, додека Висла Плоцк го надигра ГОГ со 30-28.