Ѓоковиќ ужива во одморот – игра сиртаки и „сече вени“ на Синан Сакиќ во Атина (ВИДЕО)

19 ноември 2025 - 12:45

За најдобриот тенисер на сите времиња, Новак Ѓоковиќ, годината веќе е завршена, откако не настапи на завршниот мастерс во Торино, па периодот го користи за одмор и забава во својот нов дом Атина, каде што „принудно“ мораше да се пресели по жестоките напади од режимот на српскиот претседател, Александар Вучиќ, поради поддршката што ја дае на студентскиот отпор.

Видео објавено на социјалните мрежи предизвика големо воодушевување, со оглед што на него се гледа како популарниот Ноле и грчкиот пејач Константинос Аргирос заедно играат сиртаки во еден атински клуб.

„Новак каде и да се појави буди позитивни емоции, а изгледа дека Грција особено му прилега“, стои во описот на снимката.

Во вториот дел од видеото може да се види и моментот кога за време на веселбата се пушта песна од Синан Сакиќ, по што Ѓоковиќ повторно излегува на подиумот и продолжува да слави заедно со Аргирос, кој важи за најпопуларен грчки пејач меѓу помладата генерација.