Магично: Две држави обезбедија пласман на СП играјќи квалификации на - ист стадион!

Ова скромно фудбалско игралиште со капацитет од околу 10.000 гледачи се наоѓа во Вилемстад, главниот град на малата островска држава. Името го носи по легендарниот голман Ерхилио Хато – „Црниот пантер“ – кој важеше за еден од најдобрите на Карибите, но одби да игра во Европа за да не стане професионалец.

Првата селекција што го направи подвигот беше Курасао. Под водство на легендарниот холандски тренер Дик Адвокат, државата стана најмалата и по површина (444 км2) и по број на жители (околу 156.000) што некогаш се пласирала на Мундијал. На истиот тревник до успех стигна и Хаити. Поради тешката безбедносна и политичка состојба, Хаити не игра дома уште од јули 2021 година, па Вилемстад стана нивно постојано „домаќинско“ пристаниште. Интересно, распоредот бил направен така што Курасао е гостин кога Хаити е номинален домаќин – и обратно – што им овозможи двете селекции да ги одиграат квалификациите на ист стадион.

Ова е уште еден доказ дека фудбалот често создава неверојатни животни приказни, а оваа несомнено се вбројува меѓу најубавите. Мал стадион, два различни народа и еден ист сон – и двете репрезентации од Вилемстад одат на Мундијалот.