Голем удар за центарци: Работнички без странците на мегдан против Пелистер!

Причина за тоа е суспензијата на ФИБА за регистрација на странци, изречена поради шест пријави од поранешни кошаркари и функционери за неисплатени обврски. Со тоа, најтрофејниот македонски клуб е принуден да настапи исклучиво со домашни сили во воведното дерби. Проблемите влијаеја и врз терминот на натпреварот. Наместо во понеделник навечер со директен пренос на МТВ, „центарци“ се решија да играат в недела од 15 часот во салата „Кале“. Првичната намера на клубот беше да закаже подоцнежен термин и да добие дополнително време за регистрација, но тоа не вроди со плод.

Челниците на Работнички се надеваат дека до второто коло и дуелот со градскиот ривал ТФТ ќе биде надмината административната пречка и странците ќе можат да се појават на терен.