Јунајтед со пенал од ВАР во последната секунда ја прекина црна серија (ВИДЕО)

30 август 2025 - 18:14

Екипата на Манчестер Јунајтед стигна до првата победа во новата сезона и тоа дури на четвртиот официјален натпревар, откако со гол буквално во последните секунди го совлада Барнли (3-2) на „Олд Трафорд“.

Гостите беа на чекор до бод, но Бруно Фернандеш во петтата минута од надополнувањето реализираше пенал, кој претходно беше досуден по ВАР-интервенција заради влечење на дрес. Натпреварот беше исполнет со пресврти. Јунајтед поведе со автогол на Кален, а новото засилување Мбеумо дебитираше со првенец. Барнли одговори преку Фостер и Ентони, но капитенот на „ѓаволите“ донесе триумф во последните моменти.

Во другите дуели од колото, Борнмут го изненади Тотнем во Лондон со минимална победа (1-0). Брентфорд пропушти голема шанса за гостински бод на теренот на Сандерленд. Тимот од Лондон водеше со голот на Игор Тиаго, но во самата завршница прими два гола и загуби. Прво Енцо Ле Фе израмни од пенал, а во надополнувањето Вилсон Исидор ја донесе победата за домаќините, кои претходно нереализираа уште еден пенал.

Гостинска радост имаше и за Евертон. Избраниците на Дејвид Мојс го совладаа Вулверхемптон (3-2), во натпревар со многу возбудувања. Бето, Ндаје и Друзбери-Хол беа стрелци за „карамелите“, додека Хванг и Лопез Гонзалез погодија за „волците“.