Башкими во Куманово сака да го спречи налетот на Струга!

Целта на стружани е колку што можат подолго да го продолжат перфектниот учинок, па целта на денешниот меч е победа.

„Башкими на позитивен начин ја започна сезоната во елитата. Имаат квалитетен состав, а дополнително уживаат и голема поддршка од публиката. Свесни сме што нè очекува во Куманово, но подготвени сме за предизвикот и веруваме дека ќе успееме да ја продолжиме победничката низа,“ изјави дефанзивецот на Струга, Гледи Мици.

Во Башкими се надеваат дека на крилјата на своите навивачи ќе го прекинат идеалниот старт на Струга.

„Играме против Струга Трим Лум, која има стопроцентен учинок, три победи од три натпревари. Ние се подготвувавме за овој меч како и за секој досега. Имавме добар старт на сезоната и сакаме истото да продолжи и по ова коло. Ќе биде тешко, но Башкими на секој натпревар оди на победа, особено кога играме дома. Ќе дадеме сè од себе за да славиме и на овој меч,“ рече фудбалерот на Башкими, Есмин Личина.