Силекс патува во Гостивар со една цел - да се победи со „чиста мрежа“!

По првите три кола Силекс има перфектен учинок, кратовскиот тим не прими ниту гол, но мора да се напомене дека мечот со Шкупи го добија службено.

Капитенот на Силекс, Дарко Анѓелески вели дека целта денеска е да се победи без примен гол.

„Сакаме во Гостивар да одиграме добар натпревар, да наметнеме наш ритам од првата минута и со поволен резултат да се вратиме во Кратово. Се надевам дека ќе ја продолжиме серијата на победи и натпревари без примен гол. Играме против добар тим со доста нови фудбалери во своите редови. Добро ги анализиравме, цела недела се подготвувавме за овој натпревар и сметам дека ако ги исполниме задачите од стручниот штаб од првата до последната минута, со поволен резултат ќе си заминеме од ова гостување“, вели Анѓелески.

Во Арсими се свесни дека Силекс е квалитетен противник, но оптимисти се дека резултатот ќе биде во нивна полза.

„Свесни сме дека не очекува многу тежок натпревар против квалитетен противник каков што е Силекс. Знаеме дека ќе биде голем предизвик, но нашиот тим работеше со посветеност во изминатиот период и сме максимално мотивирани да дадеме сè од себе на теренот. За нас е важно да прикажеме дисциплинирана игра и да се бориме до последниот свиреж за позитивен резултат. Ги повикуваме навивачите да бидат со нас, затоа што заедно со нив веруваме дека можеме да ги оствариме нашите цели и да ја завршиме оваа фаза со позитивен резултат“, вели фудбалерот од средниот ред на Арсими, Малиќ Белули.