Алкараз вторпат по ред ќе игра во финале на Ролан Гарос – ривалот му се предаде!

06 јуни 2025 - 17:19

Шпанскиот тенисер, Карлос Алкараз, се пласира во финалето на вториот годинешен гренслем-турнир Ролан Гарос, откако неговиот полуфинален ривал, Лоренцо Мусети, го предаде полуфиналниот дуел пред стартот на четвртиот сет.

Првите два сета воопшто не навестуваа ваков епилог, особено што Италијанецот го доби првиот со 6-4 во гемови. Алкараз по голема борба дојде до вториот сет и тоа по тај-брејк, за потоа неочекувано лесно и тоа со неверојатни 6-0 го доби и третиот за водство со 2-1. Тоа беше показател дека Мусети има здравствени проблеми, што се потврди откако реши да се повлече и да не го доигра дуелот.

Шпанецот во големото финале во Париз, каде што ќе се најде втора година по ред и каде што го брани трофејот, ќе се сретне со подобриот од втората полуфинална пресметка помеѓу Новак Ѓоковиќ и Јаник Синер.

ФОТО: EPA PHOTO