„Ќе се бориме за опстанок во лигата, но и за трофејот во Купот на Македонија“

12 јануари 2025 - 12:32

Најтрофејниот македонски фудбалски клуб Вардар почна со подготовките за вториот дел од сезоната во Првата лига, каде што го чека тешка битка за опстанок во елитата, но и борба во македонскиот Куп.

„Црвено-црните“ направија големи промени во претходните денови, а како нови засилувања на Вардар пристигнаа Георги Јанкулов, Давор Талески, Едиз Спахиу и Михал Пинтер.

„Имаме високи очекувања за вториот дел од сезоната. Приоритет ни е добар пласман на табелата, но и Купот на Македонија. Ќе мора на секој меч да одиме на три бода“, кажа голманот Талески.

Едиз Спахиу и Михал Пинтер, исто така, ги кажаа своите очекувања, односно најавија борба за трофејот во Купот.

„Очекувам да останеме во лигата, а сакаме да го освоиме и Купот. Се надевам дека сè ќе биде добро на крајот“, кажа Спахиу.

„Ќе се борам максимално за Вардар. Прва цел ни е опстанок во лигата, а втора цел ни е освојување на Купот“, посочи Пинтер.