Првпат по 22 години, Надал ќе ја заврши сезоната без Гренд слем победа

08 август 2024 - 09:50

Некогаш најдобриот светски тенисер Рафаел Надал синоќа објави дека нема да учествува на Ју-Ес Опен и со тоа стави крај на сезоната, кога станува збор за настапите на Гренд слем турнирите.

Нив ги немаше многу оваа сезона бидејќи за Надал се беше подредено на Олимписките игри. Не играше ни на Австралија Опен, ни Вимблдон, а на „Ролан Гарос“ загуби во првото коло од Александар Зверев.

Ова значи дека сезоната 2024 Надал ќе ја заврши без ниедна победа на Гренд слем турнирите што е прв таков случај за него по 2002 кога имаше само 16 години и беше на почетокот од својата професионална кариера. Тогаш беше на 762. место на АТП листата и немаше право на настап на Гренд слем турнирите во сениорска конкуренција, па се натпреваруваше со јуниорите и настапи на неколку АТП турнири. Првата победа ја оствари во 2003 година на Вимблдон каде стигна до третото коло.