Скариоло: Македонија може да ни направи многу проблеми, посебно Вајли!

Македонија и Шпанија го отвораат главниот квалификациски циклус за СП во 2023 година, откако нашата селекција го мина претквалификацискиот филтер и сега Скариоло ги предупредува своите избраници гостувањето да не го земаат здраво за готово, зашто пред себе имаат противник кој е брз и физички силен.

„Македонија има играчи на високо европско ниво, а посебно тоа е Џејкоб Вајли, кој секако има голем потенцијал и кошаркар кој може да ни направи многу проблеми. Македонија има брзи играчи, атлетски градени, посебно ниски и агресивни плејмејкери кои може да пенетрираат, а плус играат и на надворешна страна. Ние може да победиме, само ако одиграме на највисоко ниво“, вели Скариоло.

Според шпанскиот селектор, тактичката добра подготовка и игра со памет и концентрација треба да биде вовед за победа, а тренинзите во овие подготовки му покажале дека кошаркарите се полни со енергија и ентузијазам, но сето тоа ќе треба да го покажат на теренот.

„Сите играчи јасно покажаа дека привилегија и чест е да се носи овој дрес, па очекувам тоа да го покажат. Но, нема ништо лесно да ни биде во Македонија и може да имаме големи проблеми ако не влеземе максимално во мечот. Мислам дека овие четири дена најдобро ги искористивме за да направиме кохезија во тимот, а играчите да го сфатат концептот“ , додава шпанскиот селектор.