Нов блесок на Јакимовски, недоволен за победа на Колорадо

28 ноември 2024 - 08:13

Репрезентативецот на Македонија, Андреј Јакимовски уште еднаш беше меѓу најдобрите во тимот на Колорадо, откако пред два дена му донесе триумф во дуелот со шампионот Јукон.

Бафалос играа со Ајова Стејт во дуел за петтото место на турнирот на Хаваи кој влегува и во календарот на НЦАА и загубија со 71-99 што е втор пораз за нив во седмиот меч оваа сезона. Колорадо беше во двоцифрена негатива од која не успеа да се извлече до крајот на натпреварот, па последните десетина минути беа само формалност.

Јакимовски заврши како втор стрелец во својата екипа со 18 поени на кои додаде четири скока и една асистенција, а долго време ги предводеше Бафалос како единствен со двоцифрен број поени. По седум одиграни натпревари, Колорадо има биланс од пет победи два пораза, но главните дуели, со екипите од конференцијата допрва следуваат.