Можело и обратно: Македонија „краде“ голема надеж на српската кошарка! (ВИДЕО)

09 јули 2018 - 15:25

Македонската кошарка во изминативе речиси три децении од осамостојувањето загуби плејада таленти кои наместо за нашата решија да играат за репрезентацијата на Србија (претходно СР Југославија), но деновиве се случува нешто обратно – ние да им украдеме на соседите голем кошаркарски талент.

Како што Драган Луковски, Ненад Зивчевиќ и во скоро време Дино Боцевски тргнаа на север желни за докажување во реално подобра кошаркарска средина, големиот српски талент Данило Дабетиќ (16 год, 194 см) е решен да го исчекори истиот пат, но во обратна насока. Станува збор за млад кошаркар кој изминатиов период настапува за тимот на Плеј 017 од Бујановац и кој деновиве се подготвува со кадетската репрезентација на Македонија.

Информациите од Куќата на кошарката, засега неофицијално, велат дека е веќе почнат процесот за негова натурализација и дека се очекува тој да настапи на Европското првенство (ЕП), дивизија Б, кое од 9-18 август ќе се одржи во Сараево (БиХ). Дабетиќ иако е релативно висок за својата возраст, игра на бековската позиција, а се карактеризира со прецизен шут од далечина и со завидна техника која му овозможува лесно поентирање со влезови под кошот.

Дел од подготовките на кадетската национална селекција е уште едно име кое настапува надвор од македонските граници и тоа Матеј Перица, кој доаѓа од Франција и има македонски корени.