КФМ се огради и ги осуди националистичките слогани на мечот против Романија!

На трибините беше забележано националистичко навивачи од страна на помал дел од присутните, кое федерацијата го оцени како „неприфатливо и спротивно на вредностите што спортот ги негува“.

„Таквите постапки не го претставуваат духот, вредностите и идентитетот на нашата федерација, ниту го отсликуваат мнозинството од нашите навивачи, кои секогаш ќе бидат пример за спортска култура и поддршка“, порачуваат од КФМ.

Во официјалната реакција се додава дека говорот на омраза и националистичките пораки немаат место на спортските настани:

„Националистички пароли, говор на омраза и поттикнување нетрпеливост немаат место ниту на трибините, ниту во спортот воопшто“, додаваат од Куќата на кошарката.

Од федерацијата апелираат до публиката да се воздржи од слични постапки во иднина и да придонесе кон создавање на инклузивна и безбедна средина на спортските борилишта. Воедно, КФМ најавува целосна соработка со институциите за идентификација на инволвираните поединци:

„Секогаш ќе соработуваме со надлежните институции за идентификација на инволвираните лица, за да спречиме повторување на вакви изолирани случаи“, велат од КФМ.

И покрај инцидентите, од федерацијата потенцираат дека натпреварот бил организиран на највисоко ниво и добил позитивни оценки од сите страни, а жалеат што „една мала група го искористи за несоодветни цели“.

„Повторуваме: спортот обединува – не дели. Нашата заедничка цел е фер натпревар, меѓусебна почит и достоинствено претставување на нашите бои“, завршува соопштението на КФМ.

Оградувањето од Куќата на кошарката доаѓа по реакцијата на дел од албанската јавност во државата, но и на дел од политичарите кои се претставници на албанското малцинство во власта.