Јакимовски остана без заб во големиот триумф на Вашингтон стејт (ВИДЕО)

09 март 2023 - 11:33

Македонскиот кошаркарски репрезентативец, Андреј Јакимовски, имаше двоцифрен поентерски учинок во триумфот на Вашингтон стејт универзитетот во пресметката со Калифорнија универзитетот (69-52), која долго ќе ја памети бидејќи остана без заб.

Ова беше дуел од првото коло на турнирот ПАК 12-конференцијата, кој се игра во Лас Вегас, а кој е во склоп на популарното „мартовско лудило“ во НЦАА-лигата. За Вашингтон Стејт ова е првпат од 1983 година да победи седум натпревари по ред против ривали од својата конференција.

Јакимовски на теренот помина 29 минути и за тој период постигна 10 поени (две тројки) и четири скока. Најефикасен во тимот беше Бамба со 17 поени, а Родман оствари дабл дабл со 10 поени и 11 скока.

За Вашингтон стејт нема одмор, бидејќи веќе вечерва следува нов натпревар на турнирот во Лас Вегас и тоа против Орегон универзитетот (23.30 часот). Во оваа фаза од НЦАА лигата нема поправен испит и секој пораз значи крај на сезоната. Овие екипи веќе два пати играа во актуелната натпреварувачка кампања и остварија по една победа.