Леле, што му направи Дражен на „кралот“: Најубавата симфонија на Моцарт во дресот на Цибона (ВИДЕО)

03 април 2020 - 12:27

Во време кога спортот е замрен поради глобалната пандемија со коронавирусот, речиси да нема медиум што не го користи празниот простор за пополнување со потсетувања на поранени значајни случувања и незаборавни моменти, каков дефинитивно е настапот на легендарниот Дражен Петровиќ во финалето од Купот на европските шампиони против Реал Мадрид, одигран на денешен ден во 1985 година.

Сигурно најдобриот кошаркар на Стариот континент на сите времиња со маестрална игра го предводеше „волците“ од Загреб до првата европска титула во големото финале во Атина, во кое постигна 36 поени во триумфот над „кралевите“ со 87-78. Тоа можеби е и најубавата симфонија која кошаркарскиот Моцарт ја „отсвири“ во дресот на Цибона, со која и следната сезона беше најдобар во Европа, со триумфот над Жалгирис (94-82) во финалето од завршниот турнир во Будимпешта.

Дражен потоа замина токму во Реал Мадрид, од каде отиде во НБА, прво во Портланд трејлблејзерс каде што не доби шанса, а потоа и во Њу Џерси нетс каде што го докажа раскошниот талент и пред Американците. И, кога требаше да се етаблира меѓу најдобрите во светот, трагично загина во јуни 1993 година во Германија.