Кочов претпазлив: И во убедливиот триумф се уверивме колку опасна екипа е Спарс!
Фактот што овие два тима в среда ја почнуваат полуфиналната плејоф-пресметка беше причината поради која гостите дојдоа без четворицата најдобри, додека сино-белите калкулираа со минутажата на најдобрите поединци. Но и покрај тоа, стратегот на „металците“ е задоволен од прикажаното, пред сѐ од убедливиот триумф, но и повторното уверување дека против себе ќе има опасен ривал.
„Одигравме натпревар без посебен набој и без никакво резултатско значење. Противникот дојде со четири играчи помалку, но за нас беше важно да победиме и да направиме еден добар 'тренинг' како подготовка за полуфиналето од плејофот против истиот ривал. Мислам дека успеавме во тоа. Спарс и без отсустните кошаркари покажа дека е опасна шутерска екипа, поради што очекувам тешка борба во доигрувањето“, изјави Кочов.
Полуфиналната плејоф-серија се игра во две победи, првиот меч в среда е во Сараево, а реваншот следната недела (24 март) во „Јане Сандански“. Евентуалната „мајсторка“ ќе се одигра повторно во босанската престолнина на 28 март.