И Чикаго ја почувствува моќта на Кливленд: Кавс се израмнија со тимот на Џордан (ВИДЕО)

Кавс како гости го победија Чикаго со 119-113 и дојдоа до 12. победа по ред од почетокот на новата натпреварувачка камапња и сега го имаат шестиот најдобар старт во историјата на НБА. Интересно е тоа што токму во Чикаго го израмнија ефектот на Булс од сезоната 1996/97, поставен од тимот на Мајкл Џордан кој многумина го сметаат за најдобар на сите времиња. Рекордот го држи Голден Стејт Вориорс од сезоната 2015/16 и тој изнесува 24/0 што значи дека Кливленд сега е на половина пат од тоа достигнување.

Како и на неколку натпревари претходно, Кливленд повторно беше во негатива, сега од девет поени во третата четвртина, но и во тие моменти сите беа свесни дека гостинскиот тим е способен да направи пресврт. Се разигра Донован Мичел, па Кавс направија серија од 15-2 и уште пред крајот на тој период го презедоа водството. Кон средината на последниот квартал Чикаго израмни во два наврата, но немаше сили да ја прекине серијата на противникот.

Синоќа најефикасен беше Мичел со 36 поени, а далеку зад него останаа соиграчите Гарланд и Мобли со 18, односно 17. Кај Чикаго, прв стрелец беше Лавин со 26 постигнати поени.

РЕЗУЛТАТИ
Чикаго - Кливленд 113-119
Хјустон - Вашингтон 107-92
Њу Орлеанс - Бруклин 105-107
Оклахома - ЛА Клиперс 134-128
Сан Антонио - Сакраменто 116-96