Вембањама играше како вонземјанин, Бриџис го спаси првакот, сензација во Сакраменто (ВИДЕО)

Драматичната завршница во „Медисон Сквер Гарден“, монструозната партија на Виктор Вембањама и големото изненадување во Сакраменто ја одбележаа изминатата ноќ во НБА-лигата.

Мајлс Бриџис израсна во херој на актуелниот шампион Њујорк Никс, откако со тројка со звукот на сирената донесе победа од против Портланд (97-96) и спречи огромен пресврт. Никс имаа предност од дури +26 во првото полувреме, но гостите се вратија во игра и преку слободните фрлања на Дени Авдија поведоа на три секунди пред крајот. По тајм-аутот, Бриџис се дигна на шут преку Тумани Камара и погоди за триумф. Џејлен Брансон беше најефикасен кај домаќините со 30 поени (19 во првата четвртина), додека кај Портланд се истакнаа Клинген (22 поени, 13 скока) и Авдија (20 поени).

Неверојатна партија прикажа Виктор Вембањама во победата на Сан Антонио над Њу Орлеанс (114-91). Французинот постигна дури 50 поени (32 во првото полувреме), дополнети со 19 скока, пет блокади и четири украдени топки (статистика каква што немал никој во последните 50 години), а играта ја напушти на шест и пол минути пред крајот веднаш по тројката за „педесетка“. Со овој триумф Спарс го делат првото место на Западот со Лејкерс (14-3). Кај ослабениот Њу Орлеанс, кој настапи без Зајон, Марфи, Матурин и Дежонте Мареј (кој побара трејд), најефикасни беа Фирс со 29 и Пул со 25 поени.

Педесет поени, што е и негов рекорд на кариерата, постигна и Тајлер Хироу во матинe-терминот, но тоа не беше доволно за Милвоки, откако Филаделфија славеше со 132-129.

Изненадувањето на вечерта го направи Сакраменто, кој го совлада Бостон (97-96) со кошот на Киген Мареј од одбиена топка преку тројца противнички кошаркари. Причард промаши тројка за победа со звукот на сирената, па Кингс ја прекинаа серијата од осум порази и го запишаа првиот домашен триумф сезонава. Сите пет стартери кај домаќините беа двоцифрени, предводени од Акуф Џуниор со 21 поен, осум асистенции и шест скока. Бостон, без Тејтум, Вајт и Мичел Робинсон, одигра очајно во шутот за три поени – само 22 проценти реализација од дури 58 обиди.

Во останатите дуели, Далас предводен од Кајри Ирвинг (25 поени) и Купер Флег (22 поени, осум скока, шест асистенции) со серија од 11-0 во финишот ги совлада ЛА Клиперс (110-100), нанесувајќи им го седмиот гостински пораз во исто толку мечеви. Минесота, пак, на домашен терен му го нанесе првиот гостински пораз на Мемфис (104-95), со 25 поени на Џејден Мекдениелс и по 16 на Досунму и Куминга.

РЕЗУЛТАТИ: Њујорк – Портланд 97-96, Далас – ЛА Клиперс 110-100, Минесота – Мемфис 104-95, Сан Антонио – Њу Орлеанс 114-91, Сакраменто – Бостон 97-96, Филаделфија – Милвоки 132-129.