Лејкерс победи и со Леброн, двајца кошаркари на Портланд постигнаа 82 поени (ВИДЕО)

Кошаркарите на ЛА Лејкерс дојдоа до само шестата победа во 17. меч сезонава во НБА, откако ноќеска, како гости, го совладаа тимот на Сан Антонио спарс (105-94).

Ова беше четврти триумф во последните пет натпреври за „езерџиите“, а прв по подолго време со Леброн Џејмс во екипата, кој се врати по пропуштените шест дуели поради повреда. Тој средбата ја заврши со 21 поен, осум скока и пет асистенции, а одлично одигра и Ентони Дејвис, кој средбата ја заврши со 25 поени и 15 скока.

Најдраматично од ноќешната понуда во најсилната лига беше на дуелот помеѓу Портланд трејлблејзерс и Њујорк никс одигран во „Медисон Сквер Гарден“ во кој гостите победија со 132-129 и тоа по продолжение од пет минути. Џереми Грент со личен рекорд од 44 поени и Енферни Симонс со 38 поени, беа творци на триумфот на тимот од Орегон, а им помогна и Јусуф Нуркиќ со 20 поени, осум скока и седум асистенции. Грент на мечот изведе дури 28 слободни фрлања, што е најмногу сезонава во НБА и клупски рекорд на Портланд.

Јанис Адетокумбо и Стеф Кари беа најзаслужни за победите на своите тимови. Гркот со 38 поени го предводеше Милвоки бакс до триумф над Кливленд кавалирс (117-102), во кој имаше дури девет забивања, што е негов личен рекорд. Кари, пак, уфрли 33 поени, од кои 13 во последната четвртина, за победа на Голден стејт вориорс над Јута џез (129-118).

Никола Јокиќ со дабл-дабл ефект беше меѓу најзаслужните за триумфот на Денвер нагетс над ЛА Клиперс (114-110). Српскиот центар постигна 19 поени со 13 скока и шест асистенции, додека Гордон имаше 29 поени и седум скока, а на другата страна Вол имаше 23 поени.

РЕЗУЛТАТИ: Орландо – Филаделфија 99-107, Њујорк – Портланд 129-132 (п), Бостон – Сакраменто 122-104, Хјустон – Атланта 128-122, Индијана – Бруклин 128-117, Мемфис – Њу Орлеанс 132-111, Мајами – Вашингтон 110-107, Милвоки – Кливленд 117-102, Оклахома – Чикаго 123-119 (п), С. Антонио – ЛА Лејкерс 94-105, Феникс – Детроит 108-102, Г. Стејт – Јута 129-118, ЛА Клиперс – Денвер 104-114.