Криза кај шампионот: Трет пораз на Бостон во последните четири меча (ВИДЕО)

30 декември 2024 - 09:03

Бранителот на титулата во НБА лигата, Бостон Селтикс е се подалеку од првото место во Источната конференција по серијата лоши резултати.

Шампионот ноќеска го доживеа третиот пораз во последните четири меча откако на домашен терен загуби од Индијана со 114-123. Клучен момент на средбата беше серијата од 13-0 на Индијана во последната четвртина по која гостите отидоа на 118-103.

Победата на Пејсерс е апсолутно заслужена за што најдобро зборува фактот што од средината на втората четвртина тие беа во водство и го диктираа темпото и покрај тоа што Бостон на моменти знаеше да се доближи и да ја врати драматиката. Мора да се истакне и катастрофалниот шут на Бостон и инсистирањето на тројки бидејќи домашните кошаркари имаа дури 54 обиди од дистанца, а погодија само 16.

Тајрис Халибартон ја предводеше Индијана со 31 поен, но на крајот се се сведе на тимската игра бидејќи Бостон имаше тројца од најдобрите четворица стрелци, а сепак не успеа да триумфира. Џејлен Браун исто така заврши со 31 поен, Тејтум додааде 22, а Причард 21. 

РЕЗУЛТАТИ
Минесота - Сан Антонио 112-110
Хјустон - Мајами 100-104
Оклахома - Мемфис 130-106
Бостон - Индијана 114-123
Торонто - Атланта 107-136
Орландо - Бруклин 102-101