Русија остана без настап на ЛОИ со кошаркарската репрезентација

01 јули 2021 - 19:34

Русија остана без настап на Летните Олимписки игри во Токио за три недели, откако после поразот во првото коло од Мексико, денеска Германија ја победи „зборнаја“ со 69-67 и со тоа им го скрати сонот на кошаркарите од најголемата држава на светот за да играат на најголемиот спортски настан.

Имаше Русија шут за победа при водство на германците од 68-67, но положувањето го промаши Мотовилов на две секунди пред крајот, а Фојтман откако ја фати топката беше фаулиран, по што едно слободно фрлање погоди, а едно промаши за да истече времето и со тоа Германија да обезбеди полуфинале на квалификацискиот турнир во Сплит.

Фојтман даде 13 поени, Вагнер погоди 12, а Саибу и Гифај по 11 за Германија, додека само Воронцевич беше во елемент кај Русите со 17 поени и немаше поддршка од своите соиграчи.

Германија сега го чека победникот од мечот Хрватска – Тунис за противник во полуфиналето.

Словенија откако ја растури Ангола со 50 поени разлика, без мака славеше и против Полска со 112-77 за полуфинале, во меч на кој лука Дончиќ даде 18 поени за 22 минути со десет асистенции и шест скока. „Змајчеките“ најверојатно во полуфинале ќе играат против Венецуела.