Работнички почна моќно – го прегази претпоследниот освојувач на Купот (ФОТО)

27 септември 2023 - 20:19

Кошаркарите на Работнички со убедлива победа во вечерашната пресметка на домашен терен против ТФТ (73-56) ја почнаа новата прволигашка сезона, во која влегуваат со далеку поголеми амбиции од изминативе неколку години, со оглед на големиот број квалитетни засилувања ангажирани летово.

Крајниот резултат не дава реален однос на силите, со оглед што центарци беа доминантни од почетокот до крајот, а прашањето на победникот го решија уште по првите пет минути по кои беше 13-2. Домаќинот првата четвртина ја доби со плус 15 (24-9), за газењето да биде најизразено во третиот период во кој избраниците на Димитар Мираковски имаа предност од дури 27 поени (60-33). Потоа следуваше опуштање и шанса за помладите, што претпоследниот освојувач на Купот на Македонија го искористи за да ја спушти разликата на нешто поприфатлива негатива.

Американецот Квентин Декоси со 14, поени, шест скока и шет асистенции беше прво име кај Работнички, каде што одлично одиграа уште Ѓорѓи Џелетовиќ со 13 поени и 10 скока и Стојан Ѓуроски со 12 поени и девет скока. Алан Бернард Луис со 21 поен беше најдобар кај ТФТ.

Вечерва се игра уште еден меч и тоа помеѓу Чаир 2030 и Феникс, додека останатите средби од првата рунда на програмата се претстојниов викенд.