Петровиќ: Хемијата во тимот ни ја донесе посакуваната титула!

10 јуни 2022 - 21:09

Александар Петровиќ, конечно, успеа да дојде до тоа што не му успеа во претходните два мандати кои траеја речиси цела деценија, освои трофеј со МЗТ Скопје, но и во кариерата, откако неговиот тим вечерва го совлада Пелистер (102-93) и со 3-1 славеше во финалната плејоф-серија.

Искусниот стратег по средбата ги анализира случувањата на паркетот, но и на сите случувања кои претходеа на крајната радост.

„Прво би сакал да му честитам на Пелистер и на битолската публика, за фер и коректното финале. Со овој ривал победивме во пет од последните шест натпревари и мислам дека сосема заслужено ја освоивме титулата. Момците знаеја да играат кошарка и пред да дојдам јас тука, но откако пристигнав само договоривме некои дополнителни детали. Се направи хемија во тимот, а успеавме и да ја кренеме формата во финишот на сезоната кога беше најпотребно“, изјави Петровиќ.

МЗТ сезонава дојде до два домашни трофеи, во првенството и Суперкупот, а загуби во финалето од Купот на Македонија, додека најзначајниот успех на аеродромци е обезбеденото враќање во АБА-лигата.