МЗТ Скопје продолжува да се засилува - потпиша талентиран центар од БиХ!

Станува збор за 24-годишен кошаркар висок 208 сантиметри, кој игра на позицијата центар и зад себе има неколку успешни сезони во Босна и Херцеговина и Словенија. Во МЗТ Скопје доаѓа по сезоната мината во словенечкиот прволигаш Златорог Лашко, каде што просечно бележеше 12,5 поени и 7,1 скок по натпревар.

Крајиниќ ја почна сениорската кариера во Слобода Тузла, чиј дрес го носеше од 2018 до 2024 година, по што се пресели во Промо. Во тој клуб одигра одлична сезона со просек од 13 поени и 7,4 скока, што му донесе трансфер во словенечкото првенство. Од МЗТ Скопје го опишуваат како подвижен центар кој максимално ги користи својата висина и физички предиспозиции, а кој подеднакво добро се снаоѓа и во нападот и во одбраната.

Босанскиот кошаркар е второто официјално засилување на аеродромци во летниот преоден рок, по враќањето на македонскиот репрезентативец Лука Стојановски. Со неговото доаѓање, клубот продолжува да го гради тимот со кој ќе настапува во сезоната 2026/27, кога покрај домашната Суперлига и АБА2 лигата ќе се натпреварува и во групната фаза од ФИБА Еврокупот.