Хрватска немаше решение за маестралниот Јамал, Англија подобра од Чешка (ВИДЕО)

29 септември 2026 - 22:53

Во рамките на второто коло од најсилната Лига „А“ во Лигата на нации вечерва се одиграа два натпревари. Во дербито на вечерта, одиграно во Севиља, актуелниот светски шампион Шпанија убедливо ја совлада Хрватска со 4-1.

„Црвената фурија“ тргна офанзивно и уште во втората минута го отвори резултатот. По асистенцијата на Баена, Ламине Јамал одлично се снајде и го совлада Ливаковиќ за 1-0. Шпанците продолжија да доминираат, а веќе во четвртата минута имаа нова шанса. Баена шутираше, но овој пат Ливаковиќ со одлична интервенција спречи нов погодок.

Домашните продолжија со притисокот, а во 20. минута Кубарси упати добар удар, но топката за малку заврши покрај голот. Хрватска ја казни Шпанија за пропуштените шанси во 28. минута. Бељо одлично реагираше со глава и го израмни резултатот на 1-1.

Сепак, радоста на гостите траеше само три минути. Пубил погоди за ново водство на Шпанија од 2-1, резултат со кој се замина на пауза. Во второто полувреме Шпанија продолжи со својата препознатлива игра и целосно ја контролираше средината на теренот. Третиот гол стигна во 63. минута. Педри прекрасно го проигра Јамал, а младата ѕвезда на Барселона од речиси невозможен агол погоди за 3-1.

Конечниот резултат го постави Нико Вилијамс во 89. минута, за убедлива победа на Шпанија од 4-1. Јамал со два гола беше еден од најзаслужните за убедливиот триумф на светскиот шампион.

Во вториот натпревар Англија на гости беше подобра од Чешка со 2-0, стрелци за „Гордиот Албион“ беа Гордон и Хари Кејн.