МЗТ остана без уште еден Американец: Ајви се пресели во Полска (ФОТО)

08 декември 2022 - 10:01

Екипата на МЗТ Скопје останува без втор американски кошаркар во кратко време, откако по прекинот на соработката со Еван Максвел, кој не задоволи со својата игра, сино-бели таборот го напушти и Били Реј Ајви.

Плејмејкерот ја искористи можноста во договорот за раскин на соработката до крајот на годината и реши кариерата да ја продолжи во Полска, нешто налик на ситуацијата што аеродромци ја имаа пред една година со Дастин Вер. Ајви веќе е претставен како ново засилување на полскиот тим Чарни Слупск, каде што заминува по девет средби одиграни за МЗТ во регионалното натпреварување со просек од 9,9 поени, 3,7 скока и 2,6 асистенции.

Македонскиот првак сега останува со тројца странци и тоа Страхиња Миќовиќ, Александар Бурсаќ и Мајк Кафи, но се очекува наскоро да се засили со уште најмалку еден интернационалец.