МВР ги уапси напаѓачите на кошаркарот на Куманово – сакале да му го соблечат дресот!

19 мај 2025 - 10:49

Кошаркарите на Куманово во саботата го претрпеа и третиот по ред пораз во полуфиналната плејоф-серија со МЗТ Скопје, што за нив значеше крај на борбата за титулата, во меч кој имаше голем инцидент во паузата меѓу двете полувремиња, поради кој средбата се доигра пред празни трибини.

Дел од навивачите на Куманово влегоа во терен и го нападнаа нивниот кошаркар, Тадија Тадиќ, од кого побараа да го соблече дресот на нивниот клуб, најверојатно незадоволни од неговото незалагање. Тоа донесе хаос на паркетот и реакција на полицијата, која веднаш привела двајца од напаѓачите.

„Полициски службеници од СВР Куманово на 17 мај во 20 часот ги лишија од слобода А.Ј.(36) и Д.С.(29), двајцата од Куманово. На полувреме на кошаркарскиот натпревар од кошаркарската супер лига помеѓу екипите на МКК Куманово од Куманово и МЗТ од Скопје во спортската сала на средното училиште 'Перо Наков' тие се обиделе да нападнат играч од домашната екипа и да му го соблечат дресот. Тие се приведени во полициска станица и по целосно документирање на случајот против нив ќе следува соодветна пријава“, се вели во извештајот во билтенот на МВР.

Куманово се соочува и со голема казна од МКФ и подолга суспензија на теренот, особено што ова е втор ваков инцидент во кратко време, поради што овој тим средбите од четврт-финалето против Кожув ги играа пред празни трибини.