Саинц ја прекина победничката серија на Ферстапен

17 септември 2023 - 16:32

Карлос Саинц е победник на трката за Големата награда на Сингапур, со тоа ја прекина рекордната серија на Макс Ферстапен кој имаше десет победи по ред.

Возачот на Ферари тргна од пол-позицијата, извозе одлична трка, ги одби налетите на конкурентите и на крајот прв ја мина целта.

Во последните кругови дури четири возачи се бореа за победата, на Саинц во врат му дишеа Норис, Расел и Хамилтон. 

Расел не го издржа притисокот, удри во заштитната ограда во последниот круг и остана без пласман. Благодарение на тоа Хамилтон се најде на пиедесталот.

На крајот Саинц беше прв, Норис заврши втор, а Хамилтон трет. Ферстапен заврши на петтото место, што е солидно ако се знае дека стартуваше како 11.

Пред Ферстапен беше вториот возач на Ферари, Шарл Леклер. Во бодови уште беа Пјер Гасли, Оскар Пиастри, Серхио Перез, Лиам Лоусон и Кевин Мегнусен.