Историска победа на Алдегер во Индонезија, шампионот го повреди рамото (ВИДЕО)

05 октомври 2025 - 10:34

Младиот шпански мотоциклист, Фермин Алдегер, дојде до својата прва победа во кралската класа на Мото ГП, триумфирајќи утринава на трката за Големата награда на Индонезија.

Само на своето 18. појавување во елитата, Алдегер го искористи хаотичниот расплет меѓу фаворитите и стигна до најголемиот успех во својата кариера. По целта, емоциите го совладаа и 21-годишниот Шпанец не можеше да ги задржи солзите. Зад него се најде сонародникот Педро Акоста од тимот на КТМ Рејсинг, додека третото место и последното скалило на подиумот го освои Алекс Маркез од Гресини Рејсинг.

Возбудата започна уште во првиот круг, кога Марко Бецеки и Марк Маркез имаа тежок контакт по кој двајцата излетаа од патеката и ја завршија трката предвреме. Само една недела по освојувањето на титулата, актуелниот светски првак повторно се здоби со повреда на рамото.

Дукати доживеа вистинска катастрофа, бидејќи и Франческо Бањаја не ја заврши трката. По неколку кругови на дното од пласманот, во деветтата рунда тој излета и стави точка на разочарувачкиот викенд за италијанскиот производител.