Антонели со магичен круг до пол-позиција во Остин – веќе утре може да слави титула!

Лидерот во генералниот пласман не изгледаше како главен фаворит за првото место сè до третиот квалификациски сегмент (К3), но на крајот успеа да извози фантастичен круг и да го надмине „летечкиот Холанѓанец“ за 0,179 секунди. Овој викенд може да биде историски за Антонели, бидејќи тој има можност да стане најмладиот светски шампион во историјата на Формула 1.

Во текот на квалификациите се чинеше дека двата болида на Ферари ќе водат главна битка со Верстапен за пол-позицијата. Италијанскиот тим доминираше на слободните тренинзи, но целосно го загуби ритамот во завршниот дел од квалификациите, па нивните возачи ќе стартуваат дури од четвртата и петтата позиција. При првите излегувања на патеката во К3, Антонели постави најдобро време пред Верстапен, Исак Хаџар и Шарл Леклер. Водечката четворка остана во истиот редослед и по вторите брзи кругови, додека најдобрата десетка ја комплетираа Луис Хамилтон, Џорџ Расел, Оскар Пијастри, Ландо Норис, Арвид Линдблад и Лијам Лосон.

Антонели во моментов има огромни 102 бода предност пред Расел на шест трки до крајот на сезоната, под претпоставка дека Формула 1 ќе го реализира предвидениот календар со трките во Катар и Абу Даби. За да ја освои шампионската титула уште оваа недела, Антонели мора да победи на неделната трка, додека Расел треба да заврши на деветтото или полошо место, а Хамилтон на петтата или некоја послаба позиција.