Спортинг останува при врвот, голема победа на Галатасарај во борбата за плејофот во ЛШ (ВИДЕО)

03 ноември 2026 - 20:53

Спортинг продолжува со одличните настапи во Лигата на шампионите, откако забележа минимална, но исклучително важна победа од 1-0 на гостувањето кај Шахтјор Доњецк. Португалскиот состав ги освои трите бода во натпреварот одигран на „Стемфорд Бриџ“ во Лондон, каде што украинскиот тим ги игра домашните европски средби.

Одлучувачкиот момент се случи во 59. минута, кога Иса Думбија ја заврши добро организираната акција на Спортинг и ја испрати топката во мрежата. Тоа беше доволно за португалскиот тим да стигне до нов триумф и да остане во горниот дел од табелата во лигашката фаза.

Овој натпревар беше прв за Спортинг по заминувањето на тренерот Руи Боржеш, а тимот го предводеше привремениот стратег Тијаго Фернандеш. Во меѓувреме, како негов наследник се споменува Пауло Фонсека. Шахтјор, предводен од Арда Туран, не успеа да ја искористи предноста на домашниот терен. Украинците имаа добра можност уште во десеттата минута, но ударот на Педрињо беше запрен од голманот Руи Силва.

На другиот натпревар од попладневниот термин, Галатасарај оствари голема победа во трката за место во плејофот, совладувајќи го Штутгарт со 2-0. Турскиот гигант го реши прашањето на победникот уште во првите 15 минути, благодарение на расположениот Алексеј Батраков.

Рускиот фудбалер го отвори резултатот во 12. минута, по продорот на Роланд Шалаи и несигурната реакција на одбраната на германскиот тим. Само три минути подоцна, Батраков повторно ја затресе мрежата, овојпат по одличното додавање на Давинсон Санчез зад последната линија на Штутгарт. За 21-годишниот напаѓач ова беше трет последователен натпревар во Лигата на шампионите на кој постигнува гол, откако претходно погодуваше и против Барселона и Лил. Галатасарај го доведе во август од Локомотив Москва за 25 милиони евра.

Штутгарт се обиде да се врати во натпреварот, но немаше доволно среќа ниту во завршницата. Џејми Левелинг уште во осмата минута ги погоди двете стативи, а во продолжението Дениз Ундaв ја погоди пречката. Погодокот на Крис Фирих во второто полувреме беше поништен поради офсајд по интервенција на ВАР.

Со овој триумф Галатасарај освои исклучително важни бодови во борбата за пласман во плејофот, додека Спортинг продолжи да ја потврдува својата позиција меѓу најуспешните екипи во досегашниот тек од натпреварувањето.