Мурињо по триумфот против Интер: „Можеше да заврши и 7-6“

Мадридскиот клуб поведе со головите на Килијан Мбапе и Федерико Валверде, додека Карлос Аугусто го намали резултатот за гостите. Интер во поголем дел од натпреварот создаваше сериозни проблеми за домашниот тим, но Тибо Куртоа со неколку одлични интервенции го спаси Реал од неизвесен финиш.

По натпреварот, Мурињо го опиша дуелот како „луд“, нагласувајќи дека резултатот можел да биде сосема поинаков.

„Можевме да постигнеме уште пет или шест гола, но исто така можеше да заврши и 7-6. Тоа е лудило кое не го сакам. Повеќе сакам да постигнеме пет, шест или седум гола, но со контрола на натпреварот“, изјави тренерот на Реал.

Португалецот посебно го истакна Тибо Куртоа, кој со своите интервенции беше еден од најзаслужните за триумфот на мадриѓани.

„Ако Куртоа не е прогласен за играч на натпреварот вечерва, тогаш веројатно никогаш нема да ја добие таа награда“, се пошегува Мурињо, иако признанието официјално му припадна на Федерико Валверде.

Тренерот на Реал се осврна и на реакциите од трибините кон Винисиус Жуниор и Килијан Мбапе. Тој застана во одбрана на Бразилецот, истакнувајќи дека сè уште не е на 100 проценти, но дека работи напорно и значително придонесува за тимот.

„Тој работи повеќе од кога било и во одреден момент ќе ни ги добива натпреварите. Вечерва даде сè од себе и има целосно право на мојата почит“, порача Мурињо.

Со победата над Интер, Реал Мадрид освои важни три бода на стартот од лигашката фаза во Лигата на шампионите. Сепак, според Мурињо, тимот има уште многу простор за напредок, особено во контролата на играта и дефанзивната стабилност.