Мега пресметка во ЛШ: Наполи и Елмас го пречекуваат големиот Реал Мадрид

Наполи и Реал Мадрид победнички тргнаа во новата сезона од Лигата на шампионите, а вечерва некој од нив ќе ги загуби првите бодови. Двата тима ќе влезат по убедливи победи во домашните првенства, се очекува навивачите да видат интересен дуел и голема борба меѓу ѕвездите на Гарсија и Анчелоти.

Елиф Елмас не се изнаигра на почетокот од сезоната, тој добива мала минутажа кај Руди Гарсија, очекувањата се дека денешниот меч ќе го почне од клупата за резерви, а во зависност од настаните на теренот ќе биде одлучено дали ќе влезе во текот на второто полувреме.

Интересно треба да биде и на вториот натпревар кој денеска ќе се игра во Италија, во Милано Интер го пречекува тимот на Бенфика кој во првото коло доживеа изненадувачки пораз на свој терен од Салцбург.

Денот ќе започне од 18:45 часот токму со Салцбург кој го пречекува Реал Сосиедад, во истиот теремин се игра и натпреварот меѓу Унион Берлин и Брага.

Останатите мечеви кои денеска се играат од 21 часот се ФК Копенхаген - Баерн Минхен, Ленс - Арсенал, Манчестер јунајтед - Галатасарај и ПСВ - Севиља.

Големо дерби има и утре, во Дортмунд Борусија ќе го пречека тимот на Милан, а ќе биде интересен и мечот во Англија меѓу Њукасл и ПСЖ.

Утре денот ќе започне со натпреварот меѓу Атлетико Мадрид и Феенорд од 18:45 часот, тогаш се игра и дуелот на Антверпен и Шахтар.

Останатите мечеви од утрешниот ден кои почнуваат се Селтик - Лацио, Црвена звезда - Јанг Бојс, Порто - Барселона и Лајпциг - Манчестер Сити.