Почнува сезоната во Еврокупот - нов мега-формат и тројца Македонци во борба за слава!

За првпат во историјата на второто по ранг европско клупско натпреварување ќе настапат дури 32 екипи, кои ќе бидат поделени во четири групи со по осум тимови. Овој проширен и погломазен систем гарантира значително поголем број натпревари и далеку подолг пат до завршницата, нудејќи им на клубовите сериозна европска сцена и пресметки со различни противници од повеќе кошаркарски средини. Македонската кошарка ќе има свои тројца претставници – репрезентативците Андреј Јакимовски и Ненад Димитријевиќ на паркетот, како и асистентот во националниот тим, Ѓорѓи Кочов, на клупата.

Јакимовски и Димитријевиќ ќе бидат главните македонски адути во играчкиот кадар, бранејќи ги боите на италијански Наполи и грчки Арис. За Андреј ова е втора сезона по ред во Еврокупот, откако минатата сезона настапуваше за екипата на Тренто. Популарниот Нено, пак, во новата сезона влегува со огромно искуство зад себе, особено по полусезоната мината во Евролигата. За време на подготвителниот период, македонскиот плејмејкер веќе се наметна како еден од апсолутните лидери во составот на Арис и од него се очекува вистински блесок во натпреварувањето. Стручниот дел од македонското претставување ќе го пополни Ѓорѓи Кочов, актуелен член на стручниот штаб на нашиот национален тим, кој повторно ќе ја извршува улогата на асистент-тренер во германскиот состав Кемниц.

Ждрепката за воведното коло веднаш им донесе сериозни тестови на македонските интернационалци. Екипата на Наполи предводена од Јакимовски ќе има исклучително тешка задача на стартот, каде што силите ќе ги одмери со актуелниот бранител на титулата, тимот на Бург. Димитријевиќ со својот Арис европската кампања ја започнува на гостински терен кај француски Ле Ман, додека Кемниц, каде што асистира Кочов, исто така ќе гостува, и тоа кај турскиот претставник Тофаш.