Газдата на ривалот на Шкендија безобразно самоуверен: Ќе ги растуриме – не се на наше ниво!

21 јули 2025 - 21:14

Газдата на ФЦСБ (поранешна Стеауа), Џиџи Бекали, изрази голема самодоверба во пресрет на дуелите со Шкендија од Тетово во рамки на второто квалификациско коло за Лигата на шампионите, потенцирајќи дека неговиот тим не само што ќе ја елиминира македонската екипа, туку ќе продолжи без поголеми потешкотии и до плејоф-фазата.

Во случај да го мине тимот од Тетово, романскиот првак ќе се соочи со подобриот од двомечот меѓу Шелбурн од Ирска и Карабах од Азербејџан. Бекали, во изјава за романскиот медиум „Фанатик“, најави дека очекува Карабах да биде следниот противник и дека ФЦСБ ќе го совлада и него.

„Според мене, ова е идеална ждрепка. Веќе ги гледам како елиминирани. Ако не можете да го победите Карабах, тогаш немате што да барате во Лигата на шампионите. Тие не се на нашето ниво – ослабени се, немаат ритам, а лигата им почнува дури во август. Ќе ги победиме убедливо, 2:0 или 3:0 дома. Плејофот ќе биде покомплициран, но до таму ќе стигнеме сигурно“, изјави Бекали.

Првиот дуел од двомечот меѓу Шкендија и ФЦСБ (20 часот) е закажан за утре на скопската арена „Тодор Проески“.