Убава вест: Мајката на голманот Возиња доби виза, ќе го гледа својот син во Мајами!

Информацијата ја соопшти лидерот на демократите Хаким Џефрис, по разговорот со американскиот државен секретар Марко Рубио. Џефрис изјави дека од Стејт департментот побарал да направи сѐ што е потребно за мајката на Возиња да може да присуствува на следниот натпревар на оваа репрезентација.

Тој посочи дека сите административни трошоци биле укинати и дека се организираат патните аранжмани за таа навреме да пристигне на натпреварот против Уругвај, кој е закажан за недела во Мајами.

„Му благодарам на Марко Рубио, на претставниците на Стејт департментот, на Владата на Зеленортските Острови и на Светската фудбалска федерација што заеднички работеа за ова да стане возможно“, изјави Џефрис.

Четириесетгодишниот Возиња привлече големо внимание на Светското првенство откако забележа седум одбрани во натпреварот без голови против Шпанија, една од главните фаворити за титулата.

По мечот, голманот откри дека неговата мајка не успеала навреме да ги обезбеди средствата потребни за добивање виза и патување во САД.

Зеленортските Острови се меѓу педесетте земји чии државјани би можеле да се соочат со обврска да уплатат гарантен депозит до 15.000 долари при аплицирање за американска виза. Мерката е дел од пошироката политика на претседателот Доналд Трамп кон патниците од земји со висока стапка на пречекорување на дозволениот престој.