„Пет минути играв фластер на Меси, ме праша дали сум нормален“

Аргентинскиот ас е најдобар стрелец на ова Светско првенство со пет гола, а неговата игра ја анализираше Марио Токиќ, поранешен хрватски репрезентативец.

„Меси има одлична ситуациска интелигенција, го користи своето тело брилијантно за да се најде пред дефанзивецот. Се чини дека нема голема брзина и секогаш е еден чекор побрз од својот чувар.

Имам позитивна анегдота од 2006 година од Базел, кога игравме пријателски натпревар со Аргентина. Покојниот Цицо Крањчар беше селектор. Влегов на полувреме и мојата единствена задача беше да го сопрам Меси. Играв фластер на него. По пет минути ме праша дали сум нормален и како тоа го следам низ целиот терен.

Но, го исклучив 45 минути. На крајот, го свртевме тој натпревар од 1-2 на 3-2. Меси играше тогаш слично како што игра сега. Поголемиот дел од полувремето го помина шетајќи наоколу и чекајќи ја топката. Во моментот кога ќе ја добиеше топката, ќе беше неверојатно опасен“, рече Токиќ.

Марио Токиќ има 29 настапи за Хрватска и две големи натпреварувања - Европското првенство 2004 и Светското првенство 2006. Сега има 50 години, а ја започна својата професионална кариера во Риека, од каде што се пресели во Динамо во 1997 година. По четири сезони во Загреб, се пресели во австрискиот ГАК, потоа во Австрија Виена во 2005 година и во Рапид во 2007 година. Кариерата ја заврши во Загреб во 2011 година.