Не се сите против Инфантино, еден фудбалски сојуз јавно го поддржа!

28 август 2026 - 15:56

Претседателот на Меѓународната фудбалска федерација (ФИФА), Џани Инфантино, денеска ја доби поддршката од домаќинот на Светското првенство во 2034 година, Саудиска Арабија, еден месец откако започна кризата предизвикана од неговиот пропаднат план за продажба на удел во светските натпреварувања на приватни инвеститори.

Фудбалскиот сојуз на Саудиска Арабија објави соопштение на социјалните мрежи во кое наведува дека во овој момент ги поддржува напорите на Инфантино за обновување на глобалното единство во фудбалот.

Инфантино изгради блиски фудбалски и политички врски со Саудиска Арабија и престолонаследникот Мохамед бин Салман и помогна Светското првенство во 2034 година да биде доделено на ова кралство. Двајцата во неделата заедно присуствуваа на настан посветен на видео игрите во Париз, кој беше поддржан од Саудиска Арабија.

Сепак, саудиските фудбалски функционери беа забележително тивки во текот на изминатиот месец, кога Азиската фудбалска конфедерација ѝ се приклучи на Европската фудбалска унија и северноамериканската КОНКАКАФ во критиките кон Инфантино.

„Во овој момент ние ги поддржуваме континуираните напори на претседателот на ФИФА, Џани Инфантино, и раководството на ФИФА за обновување на единството во рамките на фудбалското семејство и продолжување на развојот на играта за доброто на сите“, наведе овој сојуз.