Ливерпул по осум серии во пеналите го елиминираше Челси (ВИДЕО)

28 октомври 2026 - 23:23

Ливерпул и Челси одиграа 1-1 на „Енфилд“ во осминафиналето на Лига купот. Патникот во четвртфиналето беше решен по изведувањето пенали, во кои Ливерпул славеше со 6-5 по осум серии.

Двата гола на натпреварот беа постигнати од белата точка, во интервал од само три минути пред крајот на првото полувреме. Челси поведе во 40. минута, кога Морган Роџерс го реализираше пеналот досуден по прекршокот на Рајан Гравенберх врз Мојсес Каиседо во казнениот простор.

Домашниот тим одговори веќе во 43. минута. Весли Фофана играше со рака по еден корнер, а Коди Гакпо беше прецизен од пенал, погодувајќи го долниот лев агол за 1-1. 

Во второто полувреме Челси се обидуваше да стигне до втор гол. Најдобрата можност ја имаше Марко Палестра во 78. минута, кога по додавањето од Роџерс шутираше од левата страна, но голманот Џорџи Мамардашвили одбрани. Кај Ливерпул, Вирџил ван Дајк беше заменет со Џереми Жаке.

Во Лига купот нема продолженија, па по истекот на 90-те минути веднаш се премина на изведување пенали, а таму поуспешни беа избраниците на Андони Ираола.