Кафу не го сака Анчелоти на селекторската функција во Бразил

04 мај 2025 - 13:20

Иако му беше тренер во Милан и има прекрасно мислење за него како тренер, легендарниот бразилски фудбалер Кафу не смета дека Карло Анчелоти би бил идеално решение за селекторската позиција на „кариоките“.

Неодамна се случи пресврт во ситуацијата со италијанскиот стручњак и тој ја одби понудата да го предводи петкратниот светски шампион, но тамошните медиуми тврдат дека преговорите се обновени и наскоро Анчелоти треба да биде претставен како нов селектор на Бразил. Кафу тврди дека тоа не е добар избор затоа што Италијанецот не ги познава добро играчите кои настапуваат во домашното првенство.

„Наша реалност е дека во моментов немаме селектор. Дали Анчелоти би можел да биде решение? Да. Би успеал да ги постави работите на свое место, но со играчите кои ги познава, а тие играат во Европа. Да бидам попрецизен, тој не ги знае фудбалерите што играат во Бразил. Не верувам дека тој се буди во рани зори за да гледа Фламенго-Коринтијанс. Веројатно не е свесен што се случува во бразилското првенство“, вели Кафу.

Бразилската репрезентација е во длабока криза и повеќе нема суперѕвезди како што беше случај 20-тина години. Винисиус е главен играч, но тој за Бразил не игра на исто ниво како во дресот на Реал.