Бразилците се чудат: Хрватот пуши и истовремено – рекорди руши!

07 декември 2022 - 10:57

Репрезентацијата на Бразил задутре, против Хрватска, ќе го одигра првото четвртфинале на Мундијалот во Катар, поради што во центарот на вниманието во оваа земја се најдоа репрезентативците на земјата од нашиот регион.

Бразилците на големо пишуваат дека нивните момци се фаворити, но истовремено го почитуваат противникот и за него пишуваат со респект. Весникот „О Глобо“ напиша статија за Марцело Брозовиќ и за неговиот рекорд од истрчани 16,7 километри на средбата против Јапонија, со што за 400 метри го подобри досегашното сопствено најдобро остварување од дуелот против Англија на претходното СП. Најинтересно за Јужноамериканците е што тој остварува вакви резултати и покрај тоа што – пуши.

„Брозовиќ го подобри сопствениот рекорд, иако мора да се напомене дека двете средби траеја по 120 минути. Но, најинтересно е што тој е пушач, кој неколку пати е уловен како пуши. Дури и самиот објави фотографија со цигара по освојувањето на Купот на Италија со Интер. Тоа не му е првпат, претходно бил фатен како купува цигари, а на Инстаграм објави слика како пуши шиша“, пишува „О Глобо“.

Хрватска меѓу осумте најдобро дојде по подобро изведување пенали во осминафиналниот дуел со Јапонија (1-1), а Бразил убедливо ја совлада Јужна Кореја (4-1).