Aнчелоти во проблем, младата ѕвезда најверојатно го пропушта Мундијалот

22 април 2026 - 17:43

Бразилскиот офанзивец Естевао се здобил со тешка повреда на задната ложа во поразот на неговиот тим од Манчестер јунајтед, поради што неговиот настап на Светското првенство е сериозно доведен во прашање, пишува „Атлетик“.

Извори запознаени со ситуацијата наведуваат дека станува збор за повреда од четврти степен, што значи дека е малку веројатно дека ќе биде подготвен до 13 јуни, кога Бразил го игра првиот натпревар против Мароко.

По направената магнетна резонанца се потврдила сериозноста на повредата, а во Челси и пред прегледот стравувале од најлошото сценарио.

Естевао се повреди на натпреварот против Манчестер јунајтед, кој Челси го загуби со 1-0, а младиот напаѓач веќе во 16. минута го напушти теренот на „Стемфорд Бриџ“. Тренерот на Челси, Лиам Розениор, по натпреварот потврди дека фудбалерот бил во солзи во соблекувалната, а оваа повреда најверојатно значи и предвремен крај на неговата дебитантска сезона во клубот.

Крилниот фудбалер пристигна во Челси во мај 2024 година од Палмеирас и на 36 настапи постигна осум голови и запиша четири асистенции.