Алчноста на челниците на Федерацијата е причина што Меси ќе се простува против „гигантот“ Бенин

За многумина, изборот на противникот е изненадувачки. Наместо атрактивна европска или јужноамериканска репрезентација, Аргентина за последниот натпревар на Меси го избра Бенин, селекција која не спаѓа меѓу светските фудбалски гиганти.

Зад ваквиот избор, сепак, не стојат само спортски причини. Аргентина во последните години стана еден од најбараните репрезентативни брендови во светот. Освојувањето на Светското првенство во 2022 година, како и двете титули на Копа Америка, дополнително ја зголемија комерцијалната вредност на националниот тим. Токму затоа натпреварите на Аргентина носат огромен интерес, без разлика на квалитетот на противникот.

Сепак, изборот на Бенин овозможува поголем дел од приходите од натпреварот да останат кај Аргентинскиот фудбалски сојуз и тоа е главната причина поради која Аргентина вечерва игра со Бенин. Огромниот интерес за билетите, телевизиските права и целокупниот спектакл околу последниот настап на Меси претставуваат значаен финансиски приход. Во исто време, Бенин добива можност да игра против актуелниот светски шампион и најголемата ѕвезда на современиот фудбал.

Изборот на противникот доаѓа во период во кој околу раководството на Аргентинскиот фудбалски сојуз има бројни контроверзии. На чело на сојузот е Клаудио „Чики“ Тапија, а критичарите со години го обвинуваат раководството дека огромниот успех на репрезентацијата се користи за максимална комерцијализација. Во последниот период Аргентина играше и против селекции како Боливија, Буркина Фасо, Замбија, Мавританија и Ангола. Тоа повторно го отвори прашањето дали спортскиот квалитет на противниците е во втор план во однос на финансискиот интерес. Сепак, официјално станува збор за пријателски натпревар организиран во рамките на репрезентативниот календар.

Меси за сениорската репрезентација на Аргентина дебитираше во 2005 година. За повеќе од две децении стана рекордер по бројот на настапи и голови за националниот тим. Со Аргентина го освои Светското првенство во Катар во 2022 година, Копа Америка во 2021 и 2024 година, како и Финалисима во 2022 година. Тој во репрезентативната кариера постигна 125 голови на 207 натпревари.

Неговиот последен натпревар ќе биде посебен и поради присуството на голем број соиграчи со кои ја освои светската титула. На трибините се очекуваат околу 85.000 навивачи, а Аргентина подготвува голема прослава за својот капитен.